CHARLAS "Tecnoloxía e ser humano" 2.3 - Manifesto Comunista

Proletarios(/as) do mundo, unídevos!

CHARLAS TECNOLOXÍA E SER HUMANO

ALERTA SPOILER: Por favor, mirade antes as películas

Jurassic World

O labirinto do Fauno

Unha mente marabillosa

O club dos poetas mortos

A laranxa mecánica

Manifesto Comunista

Para analizar esta obra clásica de K. Marx e F. Engels neste ciclo de charlas sobre Tecnoloxía e ser humano non imos pensar en casos concretos de aplicación da ciencia e a técnica senón que imos ver a tecnoloxía coma un obxecto dos que nos rodean na nosa existencia cotiá. Como tal, a tecnoloxía aparece nunha contorna social e económica e condiciona o noso xeito de vivir, de transformar o mundo para producirmos a nosa vida material e as nosas relacións con outras persoas. Nós, no traballo organizado socialmente, producimos esa tecnoloxía, da que despois se apropian determinadas persoas en virtude dunhas leis que regulan a propiedade.
A lexitimidade destas leis pódese poñer en cuestión, e neste cuestionamento Pablo Martínez e Julen Míguez seguen a argumentación de Marx e Engels no Manifesto Comunista.

Como aparece a tecnoloxía?
Marx e Engels afirman no Manifesto que a sociedade de cada época está baseada nunha continua loita entre unha clase opresora e unha clase oprimida.
Cando se escribe este libro, para dar a coñecer a ideoloxía comunista a todas/os as/os traballadoras/es que se estaban comezando a organizar por todos os países industrializados (Unha pantasma percorre Europa: a pantasma do comunismo) os burgueses eran propietarios das fábricas e da maquinaria e o proletariado non tiña outra opción que deixarse explotar por un salario cada vez menor.
Coa chegada da revolución industrial as máquinas comezan a empregarse nas fábricas. Isto supuxo un cambio na vida do proletariado: mulleres e nenas/os comezan a ser utilizadas/os como man de obra aínda máis barata, a produción aumenta incriblemente e a burguesía enriquécese pero cada vez hai máis persoas no paro e as condicións do traballo vólvense máis e máis insoportables.
Por isto Marx e Engels animan aos proletarios a xuntarse crear partidos políticos e tomar o poder.

Que hai que facer coas máquinas?
Un dos primeiros movementos que se opuxeron á industrialización foi o ludismo. Este movemento xorde en Gran Bretaña e propugna a destrución das máquinas. O argumento era que se as máquinas fan o traballo quitándollo ao proletariado este ten que reaccionar enfrontándose ás máquinas como a un enimigo.
Pero Marx e Engels interpretan esta situación doutro xeito: a máquina e a industria, que facilitan o traballo, foron creadas polo proletariado e a inxustiza está en que a burguesía se apropie delas. Se o proletariado se une poderá quitarlle á burguesía aquilo do que se apropiou inxustamente e gozar do progreso e dos bens producidos.
Por isto rematan o seu libro coa frase tan citada:

Proletarios(/as) do mundo, unídevos!

Materiais
Podedes ver aquí a presentación que utilizamos para a charla, e picando na ligazón que está máis abaixo descargar xuntas todas as presentacións das charlas deste ano. Un saúdo, vémonos o curso que vén (esperemos que presencialmente):