CHARLAS "O MANIFESTO COMUNISTA" - 3

3ª sesión: Burgueses e proletarios (Capítulo 1 da obra)

A burguesía destrúese a si mesma como clase

Despois da análise da situación histórica na que se escribe o Manifesto e do apuntamento biográfico e filosófico sobre Marx e Engels, comezamos agora co resumo dos tres capítulos nos que está estruturada a obra. O primeiro, sobre o valor histórico da burguesía, vénnos da man de Lara Couñago, María Iglesias Oitavén, Clara Leirós e Raúl Portela.

Lara comeza explicando a idea esencial deste capítulo: Os avances que realizou a burguesía deben ser aproveitados polo proletariado para continuar facendo un mundo máis xusto.

Marx fai un percorrido histórico: como nos conta María, o modo de produción máis antigo foi o escravista, que foi superado polos pobos xermánicos que invadiron Roma e o substituiron polo feudalismo. En consecuencia, os valores cambiaron e a aristocracia fíxose co poder.

Pero a aristocracia, continúa Raúl, convertiuse nunha nova clase opresora e finalmente o sistema feudal foi substituído, mediante a eliminación dos gremios e a imposición da economía de mercado, polo sistema capitalista burgués.

As últimas conclusións extráeas Clara: Do mesmo xeito que os modos de produción anteriores foron substituídos por outros que finalmente se recoñeceron como máis xustos tamén será necesaria unha fase de ditadura do proletariado sobre a clase burguesa e o sistema resultante, a sociedade sen clases, será axiña recoñecido como o máis xusto.

 

Materiais para descargar

Descarga a presentación e o cartel picando nas iconas:

CHARLAS "O MANIFESTO COMUNISTA" - 2

2ª sesión: Marx e Engels

Marx era, ante todo, un revolucionario (Engels, ante a tumba de Marx)

A sesión de hoxe, sobre as biografias e influencias filosóficas de Marx e Engels, preséntana Diego Araújo, David Campos, José Miguel Carreira e Manuel Otero.

1. Biografías

Marx e Engels naceron en familias burguesas pero pensaron que a burguesía sería derrocada polo proletariado, que sería o encargado de construír un mundo máis xusto, e abandonaron as súas prerrogativas para tomar o seu bando nesta loita.

Karl Marx (1818 - 1883), cóntanos José Miguel, naceu en Alemaña e morreu en Londres. Viaxou moito para promover a loita obreira pero tamén porque a policía o expulsou de Francia e Bélxica. Escribía constantemente para desenvolver a teoría filosófica do comunismo e para gaña-la vida para a súa numerosa familia.

Manuel resume a vida de Engels (1820 - 1895). Procedente de Gales, coñeceu a Marx en Paris e colaboraron ata a morte deste. Apoiou a Marx en numerosas ocasións, tamén economicamente. Xuntos escribiron moitas das súas obras: O manifesto comunista, A ideoloxía alemá, 11 Teses sobre Feuerbach, O capital.

2. Influencias filosóficas

Engels e Marx recibiron influencias do Idealismo dialéctico alemán, o Socialismo utópico francés e a Economía política inglesa, pero sempre foron críticos con todas estas teorías.

Diego cita aos principais autores dialécticos (Hegel, que pensaba que eran as ideas as que facían cambiar a historia, e Feuerbach) e os utopistas (Saint-Simon, Owen e Fourier, que loitaron por unha mellora da clase obreira pero desde un punto de vista burgués e paternalista).

David explica a influencia dos economistas británicos (A. Smith, D. Ricardo). A economía liberal debía, como o seu nome indica, liberar ás clases máis baixas da tiranía da aristocracia e o control dos gremios. Pero axiña se converteu nun instrumento da burguesía para oprimir ao proletariado. A proposta de Marx e Engels é que a riqueza non sexa propiedade das persoas individuais senón do Estado, facendo así desaparecer as diferenzas de clase.

3. Materiais para descargar

Podedes baixar a presentación en Open Office e máis o cartel da charla picando nas iconas:

CHARLAS "O MANIFESTO COMUNISTA" - 1

1ª sesión: O contexto histórico

Unha pantasma percorre Europa

Benvidas/os de novo, neste curso 2012/13, ás charlas filosóficas na biblioteca do alumnado de 1º de Bacharelato. O libro elixido este ano é O Manifesto Comunista, de K. Marx e F. Engels. Publicado en 1948, o seu obxectivo era sintetizar, dun xeito que puidese entender calquera traballador/a europea/o da época, a ideoloxía que compartían todos os partidos que entón se chamaban comunistas.

Dividimos o noso traballo en seis charlas sobre os seguintes temas:

1. Contexto histórico (Introdución da obra)
2. Marx e Engels
3. Burgueses e Proletarios (Capítulo 1 da obra)
4. Proletarios e Comunistas (Capítulo 2 da obra)
5. Comunistas e Socialistas (Capítulo 3 da obra)
6. O comunismo despois de Marx

O contexto histórico

Esta primeira sesión está a cargo de Ana Alonso, Sara Hermo e Adrián Míguez.

Ana fai a presentación do tema citando as condicións inhumanas nas que vivía a clase obreira na primeira metade do século XIX e as súas causas: a industrialización, a internacionalización dos mercados e o traballo en cadea.

Sara resume os conceptos nos que Marx e Engels expresan esta alienación das/os traballadoras/es: respecto ao obxecto producido, respecto á actividade produtiva, respecto ás/os compañeiras/os de traballo e respecto ao seu propio potencial humano.

Adrián achéganos á vivencia daquelas persoas a través dos seus propios testemuños: fotografías e debuxos sobre o traballo alienado na industria e a explotación infantil, e dous textos nos que, en primeira persoa, se relata a miseria en que vivía nesta época a clase traballadora.

Materiais para descargar

Podes descargar a presentación e o cartel picando nestas imaxes: